Ndinomuwanepi

Ndiri kumutsvaka siku nesikati

Ndakamboenda kwamadzibaba yeyo zvikanzi naivo anzwa kureva kwangu asvika kudenga

Hama neshamwari ndakapesaniswa nadzo zvaporofitwa kuti ndivo vaitadzisa budiriro kwandiri

Ndikaenda kwamuvhangeri yekera kwandkasvikonzi minana uchaita yokuramwa

Chose chawabata chichava chako

Zvose zvawataura nemuzita ramwari wangu unochigashira

Mazuva akava svondo svondo dzikava mwedzi mwedzi ikava gore gore ndokuva makore

Maziso ndakasvunura ndakaringa kugarira guyo sembwa chokwadi

Ivo vachingotora zvedu varombo zvatainzi mukawedzera kupira zvinodzoka zvawanda

Ndakazoti ndagara pasi ndiye kunun’unu kufunga, ndomuwanepi Mwari wangu?

Asiri mwari wamuporofita nhingi kana wamuvhangeri yekera asi Mwari wangu

Ndomuwanepi Mwari wangu asingagari mukereke yanhingi asi anogara mumoyo mangu?

Ndakanzwa zvichinzi, mumoyo mako ndimo ari, mumoyo mako ndimo ari

Kana nengoma ndakanzwa yorira ichiti, mumoyo mako ndimo ari, mumoyo mako ndimo ari

Kana nehosho ndakanzwa dzichichekecha dzichiti, mumoyo mako ndimo ari, mumoyo mako ndimo ari

Kana hwamanda yakadairirawo ichiti, mumoyo mako ndimo ari, mumoyo mako ndimo ari

Ndakanzwa neni ndoimba ndichiti, mumoyo mangu ndimo ari, mumoyo mangu ndimo ari

Newewo dai waiziva kuti, mumoyo mako ndimo ari, mumoyo mako ndimo maari

Waitoimbawo uchiti mumoyo manyu ndimo ari, mumoyo mangu ndimo ari

Ukasiya zvokutenderera uchitsvaka Mwari ari mauri