Unofira ‘right of way’

Zvimwe zvinoda kugoverana matama

Mazano zvauri moto unogokwa

Rangu dama ndiro iro ndichiri kushama n’ai

Idzo shaya dzichibvuma kutatamuka nekudzokerana

Zvawava muchairi waiwo muchovha

Chiregochaira yako yoga motokari

Chaira motokari nedzevamwe

Ariyo madzvinyangwe asina kudzidzira kuchaira michovha

Iwo anoziva kufambisa motokari

Vasingazivi kuti mugwagwa unotaurirana navo

Ivo vasina nzeve dzekunzwa zvinotaura mugwagwa

Zviya paunoti pano handidi vanomhanyisa michovha

Apa chimhanya hako kusvika kuzana

Apa poda kudzora kumhanya

Apo poda kuwedzera kumhanya

Zvino zvoda kuti umire vamwe vadarike ugosumudzira

Apa poda kupa vamwe mukana iwe ugozotevera

Ukasadaro unoroverwa kana kurovera

Kune vaya vasingasina kudzidza mutauro wemumugwagwa

Chirego kuti ndini ndine right of way

Unofira right of way yako iyoyo

Panoda kumira, mira

Panoda kunanaira, nanaira

Panoda kumhanya, mhanya

Ukadaro, unosvika.

(c) Tinashe Muchuri